Të nderuar mbështetës,

Dëshirojmë të adresojmë deklaratat e fundit mashtruese për organizatën dhe punën tonë në lidhje me iniciativën e Komunës së Prishtinës për strehimin e disa prej qenve endacak. Është thelbësore të ipen informata të sakta, kështu që më poshtë mund të gjeni një përmbledhje të detajuar të pikave kryesore.

Së pari, le t’i rikujtojmë me mirësjellje të gjithëve se organizata jonë nuk funksionon bazuar në përgjigjet emocionale në rrjetet sociale, por i adreson të gjitha çështjet tek autoritetet kompetente dhe më pas publikon të gjitha faktet dhe situatën (dhe hapat e mëtejshëm të nevojshëm), për të informuar njerëzit siç duhet.

❗ Deklaratat mashtruese: Kanë qarkulluar deklarata mashtruese në lidhje me qendrën, si pretendimet se ajo është e mbushur me qen nga iniciativa e strehimit dhe se eutanazia është planifikuar pas 23 ditësh. Duam të sqarojmë se këto deklarata janë të rreme dhe nuk pasqyrojnë realitetin. Ne nuk mund të parashikojmë veprimet e ardhshme të Komunës së Prishtinës apo të ndonjë komune tjetër, por jemi të përkushtuar që të kundërshtojmë çdo veprim që është në kundërshtim me ligjin, siç kemi bërë gjithmonë. Mirëpo, me këtë rast, ju njoftojmë se iniciativa e komunës nuk kishte për qëllim vrasjen e qenve, pasi kapja e tre qenve është bërë edhe para kamerave televizive dhe dëshmitarëve. Në vend të kësaj, kjo iniciativë ishte një përpjekje ad hoc e planifikuar keq, bazuar në informatat e gabuara se QTK (e ashtuquajtura strehimore) ishte e licencuar për të strehuar qen. Që në momentin që organizata jonë ishte në dijeni për marrjen e qenve, ne ishim të parët që vizituam qendrën dhe kontaktuam komunën dhe Agjencinë e Ushqimit dhe Veterinarisë për të kërkuar sqarime rreth kësaj nisme dhe kërkuam lirimin e qenve. Kjo pasi qendra ku u sollën qentë NUK është e licencuar për strehimin e qenve. Vetëm tre qen janë marrë si pjesë e iniciativës së strehimit, ndërsa pjesa tjetër e qenve kanë qëndruar përkohësisht atje si pjesë e projektit të vazhdueshëm të KSVL-së në Prishtinë. Është thelbësore të thuhet e vërteta dhe të parandalohet përhapja e dezinformatave.

📹 Video e dy qenve që përleshen në të njëjtën hapësirë: Sigurisht që na shqetëson videoja që ka qarkulluar ku paraqiten qentë që përleshen dhe patjetër që është një pamje shqetësuese dhe neglizhencë e mirëqenies së kafshëve. Fatkeqësisht, ky nuk është një incident i izoluar, pasi këto kushte të strehimit (dhe edhe më keq) mund të shihen në çdo strehimore private të drejtuar nga shumë njerëz në Prishtinë dhe në të gjithë vendin (me disa përjashtime). Ne e marrim shumë seriozisht çdo neglizhencë të mirëqenies së kafshëve dhe duam t’ju sigurojmë se e kemi adresuar këtë çështje dhe kemi kërkuar nga komuna që ta trajtojë këtë çështje më tej dhe kemi biseduar me pronarin e qendrës për të parandaluar incidente të tilla në të ardhmen. Gjatë monitorimit tonë të fundit më date 22 Qershor në qendër, asnjë hapësirë nuk kishte më shumë se një qen të rritur. I vlerësojmë të gjithë që kanë ngritur zërin dhe kanë kërkuar veprime për të parandaluar situata të tilla.

🏡 Është fakt i qartë se asnjë nga strehimoret në Kosovë nuk ka specialistë të sjelljes së qenve dhe nuk ofron informacion të saktë për sjelljen bazë të qenve. Kjo mungesë ekspertize është evidente në çdo strehimore që kemi vizituar, edhe në ato që drejtohen nga aktivistët që shpëtojnë kafshë. Kemi qenë dëshmitarë të qenve që jetojnë në kushte të mjerueshme, qenve të lënduar nga përleshjet me qentë e tjerë, madje edhe raste kur qentë kanë vrarë njëri-tjetrin brenda strehimores. Këto situata ngjajnë shumë me atë që është paraqitur në videon që qarkullon. Strehimi i qenve në thelb është sfidues, dhe në Kosovë, për shkak të mungesës së gjatë të zbatimit të duhur të legjislacionit, njerëzit kanë krijuar strehimore dhe mbajnë qen dhe mace pa respektuar asnjë kriter. Veçanërisht shqetësuese është hipokrizia e aktivistëve, të cilët heshtin, pavarësisht se i shohin këto kushte shqetësuese, dhe për më tepër, dërgojnë qentë që shpëtojnë në këto qendra, duke e ditur mirë kushtet e jetës së qenve.

Organizata jonë i trajton dhe do t’i trajtojë këto çështje në vazhdimësi, ndërsa prej vitesh kërkojmë më shumë inspektime veterinare. Ua rikujtojmë të gjithëve se Komuna e Prishtinës më shumë se 1 vit më parë ka vizituar strehimoret private në Prishtinë për të kërkuar zgjidhje potenciale për të bashkëpunuar me strehimoret dhe njerëzit që po shpëtojnë qentë endacak – gjë që asnjë nga komunat nuk e ka bërë në të kaluarën.

❓ Jemi të hutuar se pse një person duhej të hynte në qendër pa folur me pronarin e qendrës për të bërë video dhe për të vjedhur qenin pa leje, në emër të shpëtimit. Qeni ishte atje si pjesë e projektit të KSVL-së në Prishtinë, dhe zyrtarët komunal dhe zyrtarët veterinar duhet të ishin njoftuar në vend se të zbatohej vetëgyqësi dhe të mirrej qeni. Për më tepër, disa nga aktivistët kanë bashkëpunuar ngushtë me QTK-në deri vonë.

💭 Sipas mendimit tonë, njerëzit duhet t’i trajtojnë të gjitha çështjet me një qasje profesionale, veçanërisht kur subjektet private dhe publike janë të hapura për aktivistët. Mbrojtja e kafshëve nuk është vetëm shpëtimi i drejtpërdrejtë i qenve, por edhe sigurimi që të mos krijohen precedentë të këqij ku njerëzit thjesht hyjnë nëpër qendra dhe marrin qen.

📅 Përditësimi i takimit: Më 22 korrik u mbajt një takim i paplanifikuar mes komunës dhe aktivistëve për mbrojtjen e kafshëve që protestuan para komunës. Në takim ishte e pranishme edhe organizata jonë. Me poshtë po ndajmë me ju rezultatet e takimit:

– Duke qenë se aktualisht nuk ka një strehimore të licencuar, komuna nuk do të vazhdojë me iniciativën për strehimin e qenve derisa të miratohet një qendër e re dhe tre qentë duhet të lirohen.

– Kur një qendër licencohet për strehim, komuna angazhohet të punojë ngushtë me aktivistët për të planifikuar strehimin e duhur për disa prej qenve endacak në qytet.

– Komuna do të krijojë një grup punues me aktivistë dhe do të ofrojë mbështetje për ata që kujdesen për qentë e komunitetit, ndërsa aktivistët do të këshillojnë komunën se si të planifikojë dhe zbatojë iniciativat në lidhje me strehimin dhe adoptimin.

Duhet të theksohet se kritikojmë Komunën për iniciativën e adoptimit pa u siguruar kushtet për strehim deri në adoptim. Sipas legjislacionit në fuqi, Komunat e kanë përgjegjësi që të sigurojnë mirëqenien e plotë të kafshëve Brenda hapësirave strehuese. E lusim Komunën që të jetë shumë më e vëmendshme në planifikimin e iniciativave të tilla dhe të përfshijë gjithmonë me kohë Shoqërinë Civile.

Përballë keqkuptimeve dhe keqinterpretimeve, është e rëndësishme të kuptojmë se emocionet mund të jenë të larta, por ne besojmë se drama në mediat sociale nuk do të ndihmojë kafshët e gjora endacake për të cilat të gjithë kujdesemi. Ne i nxisim të gjithë të mbështesin përpjekjet tona për të monitoruar punën në çdo qendër të trajtimit të qenve në mbarë Kosovën, të ofrojnë kritika konstruktive, të ofrojnë ide për përmirësimin e kushteve për qentë dhe të kërkojnë llogari kur mirëqenia e kafshëve është e rrezikuar.

Është gjithashtu e rëndësishme të kërkohet e vërteta dhe të kërkohet përgjegjësi nga çdo zyrtar i nivelit qendror ose lokal nëse ka prova të planeve për eutanizimin e qenve. Organizata jonë ka lobuar intensivisht kundër nenit të eutanazisë për qentë e shëndetshëm në udhëzimin administrativ për strehimoret, dhe ne i bëjmë thirrje kujtdo që ka informacion të ndajë atë me ne, dhe ne do të ofrojmë mbështetjen dhe kapacitetet tona të plota për të adresuar çdo shqetësim të tillë.

🙏 Mirënjohje për Dashamirët e Kafshëve: Ne shprehim mirënjohjen tonë të përzemërt për të gjithë dashamirët e kafshëve që na kanë kontaktuar me shqetësim dhe kanë kërkuar më shumë informacione dhe nuk i janë nënshtruar dramës së panevojshme. Mbështetja dhe përkushtimi juaj për mirëqenien e kafshëve vlerësohen thellësisht!

🤝 Bashkëpunimi dhe Transparenca: Ne besojmë bindshëm në fuqinë e dialogut të hapur, bashkëpunimit, transparencës dhe llogaridhënies. Qëndrimi i organizatës sonë synon të mbledhë të gjitha faktet, të promovojë dialogun dhe të jetë pjesë e zgjidhjeve humane në vend që të jetë pengesë për to.

Ne kemi marrë garanci nga Komuna dhe qendra se të gjithë inkurajohen të vizitojnë QTK-në (qendrën që kryen KSVL) për të parë nga afër kushtet dhe kujdesin që u ofrohet qenve dhe për të ofruar kritika, sugjerime ose ndihmë. Të njëjtin bashkëpunim po mundohemi të krijojmë edhe në komunat e tjera që kanë projekte aktive të KSVL-së, së bashku me aktivistë lokalë, për të monitoruar punën e veterinerëve të kontraktuar për projektet e KSVL-së. Nëse keni ndonjë pyetje ose shqetësim, ju lutemi mos ngurroni të na kontaktoni.

Faleminderit për mbështetjen dhe besimin tuaj të vazhdueshëm në misionin tonë. Përfshirja dhe përkushtimi juaj janë të dobishëm në krijimin e një të ardhmeje më të mirë për kafshët endacake.