Gjendja e mbajtjes së qenve në Kosovë është e dobët, duke rezultuar në kushte shqetësuese të jetesës për shumë qen. Mungesa e kujdesit, kushtet e papërshtatshme të jetesës dhe braktisja kanë çuar në vuajtje të shumta për kafshët shoqëruese, në veçanti qentë. Përtej mirëqenies së kafshëve, kjo situatë pasqyron vlerat e shoqërisë tonë në tërësi.

Nga rrethanat shqetësuese që prekin mirëqenien e qenve në Kosovë, organizata jonë si gjithmonë ka një qëndrim proaktiv, duke i kërkuar Ministrisë së Bujqësisë, Pylltarisë dhe Zhvillimit Rural (MBPZHR) që ta ndryshojë këtë situatë. Kjo nënkupton hartimin dhe aprovimin e “Udhëzimit Administrativ për Mbajtjen e Përgjegjshme të Kafshëve Shoqëruese”.

Vlen të theksohet se kjo nuk është hera e parë që organizata jonë bën një kërkesë të tillë. Në fakt, gjatë një takimi të palëve të interesit me fokus në menaxhimin e popullsisë së qenve, të thirrur nga Zyra e Kryeministrit dhe ku mori pjesë vetë Kryeministri më 25 janar 2022, MBPZHR, konkretisht Ministri, z. Faton Peci dhe këshilltarja/zëdhënësja e tij, znj. Flutura Mustafa, siguruan përkushtimin e tyre për adresimin e këtyre shqetësimeve me seriozitet dhe shpejtësi. Kjo është shumë e rëndësishme duke pasur parasysh se këto çështje janë neglizhuar që nga aprovimi i Ligjit për Përkujdesjen ndaj Kafshëve në vitin 2005.

Për më tepër, mbajtja me përgjegjësi e kafshëve shoqëruese dhe rregullimi i mbarështimit dhe shitjes së qenve (dhe kafshëve të tjera shoqëruese) janë komponentë kyç të Strategjisë Kombëtare për Menaxhimin e Popullsisë së Qenve dhe Planit të Veprimit, të cilat janë miratuar nga Qeveria më 26 tetor 2022.

“Udhëzimi Administrativ për Mbajtjen e Përgjegjshme të Kafshëve Shoqëruese” i propozuar që të hartohet, duhet të trajtojë këto çështje urgjente. Duke krijuar një kornizë të mirëpërcaktuar për mbajtjen e përgjegjshme të qenve, ky UA duhet të të sigurojë përmbushjen e nevojave fizike, mendore dhe emocionale të kafshëve shoqëruese. UA duhet të ofrojë udhëzime për aspektet kritike të mbajtjes së kafshëve, duke përfshirë strehimin e mirëfilltë, ushqimin e duhur, qasjen në kujdes mjekësor, trajnimin e rregullt dhe ndërveprimin social me njerëz dhe kafshë tjera.

Edukimi dhe ndërgjegjësimi luajnë një rol kyç në nxitjen e ndryshimeve. Duke nxitur mirëkuptimin publik për kujdesin e përgjegjshëm ndaj kafshëve shoqëruese, duke përfshirë macet, ne mund të kultivojmë një kulturë ku kafshët trajtohen me respektin dhe dhembshurinë që meritojnë si qenie të ndjeshme.

Ky UA mund të përmirësojë jetën e mijëra qenve, duke rezultuar në kafshë më të shëndetshme dhe më të lumtura që kontribuojnë pozitivisht në jetën e mbajtësve (pronarëve) të tyre dhe të komunitetit më të gjerë, nëse zbatohet siç duhet.

Hartimi dhe miratimi i këtij UA kërkon veprim proaktiv. Ky UA ka nevojë për mbështetjen e qeverisë për të siguruar zbatimin e tij të qëndrueshëm dhe efektiv. Pas 18 vitesh mosveprimi nga MBPZHR dhe AVUK në adresimin e kësaj çështjeje, tani kërkojmë përfshirjen e tyre të përshpejtuar.

Organizata jonë u bën thirrje individëve, organizatave dhe autoriteteve që të ngrisin zërin dhe mbështetjen e tyre për këtë nismë vendimtare. Duke bashkuar përpjekjet tona, ne mund të sigurojmë që “UA për mbajtjen e përgjegjshme të kafshëve shoqëruese” të materializohet, duke çuar në një transformim në jetën e qindra e mijëra kafshëve shoqëruese, dhe rrjedhimisht duke parandaluar braktisjen e shumë qenve në rrugë.

Si përfundim, gjendja e mbajtjes së qenve në Kosovë kërkon vëmendje të menjëhershme. Hartimi i “Udhëzimit Administrativ për Mbajtjen e Përgjegjshme të Kafshëve Shoqëruese” tejkalon një hap të thjeshtë ligjor; ai nënkupton zotimin tonë për mirëqenien e të gjitha kafshëve shoqëruese që bashkëjetojnë në vendin tonë.

Rasti i qenit në fotot më poshtë i është drejtuar AVUK-së për inspektim dhe i falenderojmë të gjithë që na shkruajnë për të raportuar kafshët në gjendje të keqe apo abuzive.

Për rastet e abuzimit dhe neglizhimit të qenve, na kontaktoni në: info@animalrights-rks.org ose veproni sipas udhëzimeve në këtë link: https://www.animalrights-rks.org/raporto-keqtrajtimin-ndaj-kafsheve/