Është nënshkruar marrëveshja e bashkëpunimit në mes të Fondacionit për të Drejtat e Kafshëve dhe AUVK-së, për përditësimin e regjistrit të kafshëve, për të përfshirë regjistrimin e kafshëve shoqëruese, ashtu siç parashihet edhe me Udhëzimin Administrativ (MBPZHR) 02/2021 për identifikimin dhe regjistrimin e kafshëve shoqëruese.

Në kuadër të kësaj marrëveshje të bashkëpunimit, Fondacioni për të Drejtat e Kafshëve, me mbështetje të znj. Helen Wormser nga Fondacioni StrayCoco, do të financojë shtimin e një komponente në regjistrin aktual të AUVK-së, për të përfshirë edhe regjistrimin e qenve me mbajtës/pronarë.

Krijimi i regjistrit qëndror është një parakusht kryesor për të filluar regjistrimin e kafshëve shoqëruese (qenve) me mbajtës/pronarë.

Regjistrimi i qenve me mbajtës është një masë më se e domosdoshme në Kosovë, pasi që një nga burimet kryesore të shtimit të qenve në rrugë janë pikërisht braktisjet e qenve nga mbajtës/pronarë të paidentifikuar, prandaj edhe organizata jonë është e përkushtuar ta ndihmojë AUVK-në për të filluar sa më shpejt me regjistrimin e qenve me mbajtës.

Për hapat e rradhës, do të ju mbajmë të informuar.