Në mungesë të qasjes në ujë, temperaturat e larta të verës janë të rrezikshme për kafshët e rrugës (dhe kafshët e tjera në përgjithësi). Në mungesë të kujdesit të duhur, shumë kafshë e kanë të pamundur t’i përballojnë këto kushte mjaft ekstreme të motit të nxehtë.

Me veprime të vogla por shumë domethënëse, ne mund t’i ndihmojmë kafshët në rrugë t’i mbijetojnë temperaturave të nxehta. Disa nga mënyrat si mund të ndihmoni:

Vendosni enë me ujë 💧: Vendosni sa më shumë enë me ujë në vende të përshtatshme për kafshët endacake por jo afër shkollave, spitaleve apo marketeve ku kafshët e rrugës do të rrezikoheshin nga dëbimi apo problemet e tjera me qytetarët që frikësohen apo nuk i duan kafshët. Do të habiteni nga numri i krijesave tjera që do të përfitonin nga ky veprim i thjeshtë. Një veprim i tillë do të shuante etjen e mijëra krijesave, të mëdha dhe të vogla – nga qentë dhe macet tek zogjtë, milingonat, grerëzat, bletët dhe madje edhe kërminjtë.

Ushqeni kafshët 🍎: Ushqyerja e kafshëve endacake me fruta dhe perime mund të jetë një trajtim i mirë për to, pasi ato janë të ëmbla dhe i ndihmojnë kafshët të hidratohen. Para se ta bëni këtë, mësoni se cilat fruta dhe perime mund t’i hajnë qentë dhe macet: https://trupanion.com/pet-care/fruits-and-veggies-for-pets – disa fruta dhe perime janë të rrezikshme për kafshët, andaj ju rekomandojmë të informoheni mirë para ndihmës që do të jepni.

Merrni masa ❗️: Frymëmarrja e vështirësuar dhe lëvizjet jonormale të kokës janë tregues të rraskapitjes ose të ndikimit nga nxehtësia. Hidhni shumë ujë me temperaturën e dhomës në trupin e kafshëve për t’i ftohur ato, fshijini ato me një peshqir të lagur dhe telefononi një veteriner ose transportojeni kafshën në klinikën më të afërt veterinare nëse e nevojshme.

Shpëtoni një jetë 🛟: Mbani vëmendjen tek të gjitha kafshët që shihni jashtë. Sigurohuni që ato të kenë ujë dhe strehim të mjaftueshëm. Nëse gjeni një kafshë në ankth, kontaktoni një veteriner ose transportojeni kafshën në klinikën më të afërt veterinare sipas mundësive.

Krijoni një vend të freskët 🏠: Krijimi i një vendi të freskët dhe me hije për kafshët endacake mund të jetë një shpëtim për ta gjatë vapës së nxehtë të verës. Këtu është një udhëzues i thjeshtë se si mund të ndihmoni:

Lokacioni: Zgjidhni një vend të qetë dhe lehtësisht të qasshëm nga kafshët endacake. Idealisht, duhet të jetë larg trafikut dhe zhurmës.

Streha: Mund të përdorni një kuti të vjetër kartoni, shtëpi qensh, apo edhe një tavolinë për të krijuar strehën. Sigurohuni që të jetë material i fortë dhe i gjerë për të siguruar hije të mjaftueshme.

Komoditeti: Mbushni pjesën e poshtme me materiale të buta si peshqirë të vjetër ose batanije. Kjo jo vetëm që siguron një vend të rehatshëm pushimi, por edhe izolon kundër tokës së nxehtë.

Uji: Lëreni gjithmonë një enë me ujë të freskët në hije. Mos harroni ta ndërroni ujin rregullisht për ta mbajtur të pastër dhe të freskët.

Kontrolloni: Monitoroni vendin kurdo që keni mundësi për t’u siguruar që po përdoret dhe nuk është shkatërruar.

Për çfarëdo pyetje apo sugjerim, na kontaktoni në info@animalrights-rks.org ose në mesengjer të faqës së Facebook-ut.